«Минута славы» росси конкурслэн финалистэз, элькун но калыккуспо фестивалъёслэн лауреатсы, Уддяди гурт калыклэсь вашкала сям-йылолъёссэ, кырӟанъёссэ но эктонъёссэ улӟытӥсь но утись. Та ваньмыз Кияса ёросысь Уддяди гуртысь «Инвожо» калык ансамбль сярысь верамын.
Туэ коллективлы 30 ар тырме ни. Туннэ «инвожоосты» Россиын сяна, Финляндиын, Эстониын, Латвиын но мукет кунъёсын умой тодо. Коллектив аслаз уженыз кык валтӥсь ужпумъёсты быдэстэ. Нырысь ик вашкала сям-йылолъёсты, кырӟан-веранъёсты гуртысьтызы егитъёслы дышетыса кельто. Соин ӵош Удмуртиез дуннелы возьмато. Вера калык ансамбльлэн кивалтӥсез Надежда Пахомова.