Комиссилэн ёзчиосыз 20-лэсь ятыр выль кылъёсты но валатонъёсты юнматӥзы. Уноез со — нимаз предприятиослэн но огазеяськонъёслэн нимъёссы. Ӵапак соосъя али калыклэн уногес юанъёсыз кылдыло. Туж умой, куке предприятиослэн кивалтӥсьёссы берыктон ужлэсь кулэлыксэ валало но милемлы вазисько, шуэ ӧрилэн ёзчиез, кылтодосъя кандидат Сергей Максимов.
Кенешоын удмурт нимкылъёсъя но шонер гожъяськонъя ӧри сярысь валатэт — положение — но юнматэмын. Соя ӧри ас вылаз басьтэ удмурт кылын нимпулъёсысь — вывескаосысь — янгышъёсты чакланэз но. Дэмен ужамлэн татын пайдаез бадӟымгес луоз, шуэ Сергей Максимов. Тросэз потэ нимпулъёслэн кузёоссы бордысь но.